Sean “Diddy” Combs po mbulon ende shpenzimet ligjore të gruas që po dëshmon kundër tij në gjyqin për trafikim seksual.
“Jane”, një grua që ka qenë në një lidhje me Combs nga viti 2021 deri në vitin 2024, deklaroi në sallën e gjyqit se Diddy e ndihmoi të punësonte avokatin që e përfaqëson aktualisht – dhe se ai vazhdon të paguajë për të. Jane pranoi gjithashtu se është ende e dashuruar me Combs dhe se ai vazhdon t’i paguajë qiranë prej 10,000 dollarësh në Los Angeles.
Jane ka akuzuar Combs se e ka detyruar të marrë pjesë në festa seksi që zgjasnin për ditë me meshkuj eskortë, të shoqëruara me drogë. Ajo tha se i kishte shprehur vazhdimisht Combs-it se nuk dëshironte të kryente marrëdhënie seksuale me burra të tjerë, por ai e kishte kërcënuar se do t’i ndërpriste pagesën e qirasë dhe do të publikonte pamje të këtyre festave.
Kur në mars 2024, shtëpitë e Combs në Miami dhe Los Angeles u bastisën nga FBI-ja, një agjent i Sigurisë Kombëtare vizitoi edhe banesën e Jane dhe la një kartëvizitë. Pas kësaj, Combs e lidhi Jane me ekipin e tij ligjor dhe më pas e ndihmoi të merrte një avokat të sajin. (Jane dëshmoi se kurrë nuk e ka paditur Combs dhe as i ka kërkuar ndonjëherë para përmes ndonjë letre zyrtare.)
Jane vazhdoi lidhjen me Combs deri në arrestimin e tij në vjeshtën e vitit 2024. Ajo dëshmoi se edhe pas bastisjeve të marsit 2024, ata vazhduan të takoheshin në “netët e hotelit”, të cilat i përshkroi si “freak-offs” (përvoja seksuale të shfrenuara).
Jane tha se kishte qëndruar me Combs edhe pasi këngëtarja Casandra “Cassie” Ventura ngriti një padi tronditëse civile në nëntor 2023, duke e akuzuar për dhunë seksuale dhe fizike. Sipas dëshmisë, Jane ndodhej në Miami me Combs kur CNN publikoi pamjet e vitit 2016 ku ai shihej duke dhunuar Cassie-n në korridorin e një hoteli.
E pyetur se ku ndodhej kur pa videon, Jane tha: “Isha në tavolinë, gati për mëngjes… por humba oreksin.” Ajo dhe Combs nuk folën për ngjarjen që shfaqej në video deri më shumë se një muaj më vonë. Ai i tregoi Jane një version paraprak të videos së ndjesës që më pas e fshiu nga rrjetet sociale. Në gjykatë u dëgjua edhe audioja e kësaj videoje, ku Combs e quante sjelljen e tij “të pafalshme.”
Dëshmia e Jane do të vazhdojë gjatë gjithë javës. Combs ka deklaruar pafajësinë për akuzat e trafikimit seksual dhe përfshirjes në organizatë kriminale. Nëse shpallet fajtor, ai përballet me burgim të përjetshëm.
