E dëgjuat, e patë, e lexuat? “Finalmente Elsa” në Tiranë!

“Finalmente Elsa”. E dëgjuat, e patë, e lexuat? Elsa rikthehet më në fund, dhe gjejeni ku?! Në një superkoncert në Tiranë, në të parën ditë të nëntorit, aty në Pallatin e Kongreseve. Teksa e sheh këtë lajm, ndërmend të vjen ajo, vajza e “lotit”, na vjen edhe vajza që çeli siparin e shqiptarëve në Sanremo, ajo e një çasti që ndal zemrën e një shpirti që këndon në përjetësi. Në një sfidë me veten dhe kohën, Elsa vjen me një koncert që pasqyrohet në një karrierë të gjatë, bashkëpunime, shkëlqime, triumfe, rrëzime, mësime, kujtime, gjithçka që oazi i muzikës përfaqëson. Në rrethin e artë të miqve e artistëve me të cilët bashkëpunon do të sjellë koncertin që Elsa ia ka borxh Tiranës e Tirana Elsës. Rikthimi në Festivalin e Këngës një vit më parë na krijoi ndjesinë unike të asaj që dashuria për muzikën mund të bëjë. Në tinguj, në vargje, në hapësirë, në sytë për të cilët koha nuk ka ecur aspak, Elsa vjen në një koncert të gjallë, të mishtë, të brishtë, të fortë, të etur, të bekuar, në Tiranën që aq shumë e ka pritur të bijën, Elsën.