Ish-reperi Fero është rikthyer në vëmendjen e publikut pas martesës së tij të dytë me Nitën, e cila deri vonë kishte qëndruar larg syrit të mediave. Megjithatë, pasi profili i saj u zbulua ekskluzivisht nga Prive, çifti nuk ka ngurruar të ndajë momente nga jeta e tyre në rrjetet sociale.
Së fundmi, Nita ka reaguar ndaj etiketimeve të vazhdueshme si “modele”, duke sqaruar se kjo ishte një pjesë e kaluar e jetës së saj.
“Nuk e di pse po shoh ‘modele’ në çdo postim të bërë për mua, kur hera e fundit që qëndrova para një kamere isha 18 vjeçe në London Fashion Week. E nisa si 15 vjeçe dhe fatmirësisht e kisha gjithmonë familjen time kudo që shkoja me vete”, ka shkruar ajo në një postim në rrjetet sociale.
Pavarësisht se ka përjetuar një përvojë të bukur në industrinë e modës, ajo theksoi se prioritetet e saj kanë ndryshuar. Sot, Nita është e përkushtuar ndaj karrierës akademike dhe profesionale, duke studiuar Drejtësi në !University College Dublin (UCD). Ajo ka fituar përvojë praktike në institucione prestigjioze si firma ligjore Dillon Eustace dhe Ministria e Punëve të Jashtme dhe Diasporës së Kosovës.
Inspirimi për këtë rrugëtim i ka ardhur nga nëna e saj, e cila ka ndërtuar një karrierë të suksesshme diplomatike në Irlandë.
“Duke parë punën diplomatike të nënës sime në Irlandë dhe duke ndjekur gjurmët e saj, më bëri të vlerësoja se sa larg kemi arritur të gjithë dhe sa e bekuar kam qenë që jam dëshmitare e etikës së punës dhe forcës që prindërit e mi kanë treguar gjithmonë”, ka treguar Nita.
Tani, teksa i afrohet diplomimit, ajo po ndjek me përkushtim një karrierë në diplomaci, duke lënë pas botën e modës si një kujtim të bukur.
