Ylli shqiptar i futbollit, Granit Xhaka, ishte së fundmi i ftuar në kanalin e njohur në YouTube, SportBible, ku mori pjesë në një sfidë interesante shijesh.
Gjatë videos, atij iu kërkua të provonte dhe të vlerësonte ushqime të ndryshme nga Britania e Madhe dhe vende të tjera të botës. Një nga momentet që tërhoqi më shumë vëmendje ishte kur në tryezë u shfaq një përballje mes një gatimi tradicional anglez, “Pease Pudding”, dhe ajvarit shqiptar.
Pa hezitim, Xhaka zgjodhi ajvarin, duke theksuar me krenari rëndësinë që ka ky produkt në kulturën tonë. “Pa diskutim që zgjedh ajvarin,” u shpreh ai, ndërsa u shpjegoi ndjekësve se ky ushqim është pjesë e pandashme e tryezave shqiptare. “Në Kosovë, të gjithë e konsumojmë për mëngjes. Gjendet në çdo shtëpi dhe edhe unë vetë e ha shpesh,” shtoi ai.
Edhe pse aktualisht luan në Gjermani me Bayer Leverkusen, Xhaka mbetet një figurë kyçe e kombëtares së Svicrës, vend ku është rritur dhe formuar si futbollist.
