Për vite me radhë, ndryshimet fizike të Vesa Lumës u komentuan pa fund në rrjete sociale, shpesh me ironi dhe supozime sipërfaqësore. Tani, këngëtarja ka vendosur të flasë hapur dhe të tregojë se pas atyre komenteve fshihej një sfidë serioze shëndetësore, jo thjesht një “trend estetik”.
“Rreth tre vite më parë, fillova të ndihesha çuditshëm në trupin tim,” shkruan ajo, duke theksuar se gjithçka nisi pa shenja tipike të shtimit në peshë apo ndryshimit të oreksit.
Në një kohë kur botox-i dhe filler-at janë kthyer në përgjigjen automatike për çdo ndryshim në pamje, edhe trupi i Vesës u bë objekt gjykimi publik.
“Publiku nuk të ‘gozhdon’ më me ‘pse je shëndoshur’, por ia vë fajin botox-it. ‘I ka fryrë botoxi, i ka bërë njësoj sikur t’i ketë pickuar bleta’,” rrëfen ajo.
Fillimisht, këngëtarja mendoi se gjithçka lidhej me stresin dhe ankthin. Por shqetësimet e vazhdueshme e shtynë të kërkonte ndihmë profesionale. Analizat hormonale zbuluan një problem konkret: rezistencë shumë të lartë ndaj insulinës, një gjendje që, nëse lihet pa trajtuar, mund të çojë në paradiabet ose diabet tip 2.
Rezistenca ndaj insulinës ndikon drejtpërdrejt në mënyrën se si trupi përpunon sheqerin, duke shkaktuar fryrje, luhatje në peshë dhe vështirësi në kontrollin e oreksit – simptoma që për vite ishin keqkuptuar nga jashtë.
“Prandaj vendosëm të kalonim tek ajo që sot quhet ‘trend’: Ozempic. Vendimi për të nisur Ozempic-un nuk ishte i lehtë. E kisha shumë frikë për shkak të efekteve anësore: të vjella, marrje mendsh,” tregon Vesa.
Ajo pranon se për një kohë të gjatë zgjodhi heshtjen, nga frika se rrëfimi i saj mund të keqinterpretohej dhe të ndikonte njerëz që nuk kanë arsye mjekësore për të përdorur këtë trajtim.
Sot, Vesa Luma thotë se është gati ta nisë sërish trajtimin, këtë herë me më shumë informacion, kujdes dhe përgjegjësi. Në fund, ajo e bën të qartë se ky rrëfim nuk është një ftesë për të ndjekur të njëjtën rrugë, por thjesht një histori personale.
