Dojna Mema ndodhet në Francë për disa ditë pushimi. Gjatë qëndrimit atje, ajo nuk ka humbur rastin të vizitojë monumente historike dhe vepra arti të cilat i ka ndarë dhe me ndjekësit në Instagram.
Mbrëmjen e kaluar moderatorja postoi një vepër të shkrepur në “Musée d’Orsay”:
“Origjina e jetës , 1886 Gustave Coubert”, shkruan Dojna në mbishkrimin që shoqëron foton.
Të shumta kanë qenë reagimet nga ndjekësit por Dojna ka preferuar t’u përgjigjet vetëm atyre që u “neveritën” nga fotoja. Teksa paralelizon revoltën e komentuesve për “veprën e artit” që i ka sjellë në jetë, me indiferencën e tyre për ngjarjet e fundit të kronikës së zezë, Dojna flet për mendësinë e një shoqërie që ngre në piedestal prapanicat e veshura pa shije dhe gropos mendimin. Gjithashtu ajo i bën thirrje të gjithave vajzave që t’i përsërisin vetes vazhdimisht se një ditë ky mentalitet dhe kjo dhunë do të marrë fund, edhe prej tyre.
“Trishtë se si gruaja që u vra mbrëmë në Durrës, si ajo tjetra që u masakrua, copëtua. E trishtë se si gratë akoma nuk e kuptojnë që sjellin jetë dhe janë mrekullia vetë. E trishtë se burrat tanë tronditen nga një vepër arti që simbolikisht “i ka sjellë në jetë” por nuk neveritet kur një vajzë dhunohet në rrugë(eksperiment i bërë në program). Boll më shatë nga mami, babi (ndjesë pastë) apo “virgjëria”, sepse asnjë nga këto nuk mbyt fatkeqësinë e një shoqërie që ngre në piedestal prapanicat e veshura pa shije dhe gropos mendimin. E trishtë si gruaja që u vra mbrëmë në Durrës, si ajo tjetra që u masakrua, u vra, u copëtua. Pastaj flasim për moral! Dhe ti 12-vjeçarja që po më lexon. Të lutem mbylli sytë dhe përsërit me veten:
Një ditë kjo dhunë, ky mentalitet do të marrë fund edhe prej meje. Sepse je qënia më e bukur e kësaj bote. Mbaj qëndrimin tënd, thuaj të vërtetat e tua edhe qëndro gjithmonë me kokën lart. Sepse je grua dhe je dhurata më e bukur e kësaj bote! Sepse je vetë jeta!”, shkruan Dojna.
Moderatorja njihet si një vajzë e shkathët dhe gjithmonë ngre zërin për kauza të rëndësishme.
