Moderatorja e njohur Kiara Tito ishte e ftuara speciale në emisionin “S’e Luan Topi”, ku veç detajeve për jetën personale dhe eksperiencën e saj si nënë e re, ajo ndau dhe disa reflektime të sinqerta mbi përvojën e saj në BBV dhe rrugëtimin personal që ka ndjekur pas përfundimit të reality show-t.
E pyetur nga moderatorja se si ndikon BBV në jetën e saj dhe nëse ajo e sheh veten si një person tjetër përpara dhe pas kësaj eksperience, Kiara u shpreh:
“Unë nuk kam folur shumë pas “Big Brother”-it, sepse nuk kam ndier nevojën. E kam mbyllur atë kapitull dhe tani shoh përpara. Ka qenë një mësim i madh për mua—sidomos kur vjen fjala tek besimi ndaj të tjerëve. Kam mësuar që jo çdo njeri është ashtu siç e mendon apo siç dëshiron ti që të jetë. Njerëzit janë të ndryshëm dhe jo të gjithë mund t’i besosh verbërisht.”
Në lidhje me pyetjen se nëse ka ndier ndonjë lëndim apo zhgënjim nga njerëz brenda shtëpisë së BBV, Kiara ishte e qartë:
“Nuk mund të them se jam ndier e lënduar apo e zhgënjyer. E gjithë ajo përvojë ishte një sfidë që të ndihmon të testosh veten dhe të jetosh në një mjedis me njerëz të ndryshëm, edhe kur karakteret nuk përputhen. Nuk më ka lënë asnjë shenjë negative, dhe tani që ka kaluar kohë, them me bindje që nuk do të kisha ndryshuar asgjë, madje as sjelljen time.”
Duke reflektuar më tej mbi përvojën, ajo theksoi se ndihet mirënjohëse që gjithçka shkoi ashtu siç duhet dhe se çdo përvojë, e mirë apo e vështirë, i ka shtuar diçka të vlefshme në jetën e saj.
“Jam e lumtur për atë që kam mësuar dhe për rrugëtimin tim. Big Brother është vetëm një pjesë e jetës time, por ajo që ndodh pas tij është shumë më e rëndësishme për mua,” përfundoi Kiara.
