Në jo pak raste personazhet e njohur janë ndeshur me komente fyese apo negative nga ndjekësit e tyre në rrjete sociale. Pavarësisht se janë ndërmarrë fushata të shumta ndërgjegjësuese kundër gjuhës së urrejtjes, duket se është gati e pamundur që të ndalet ky fenomen. Me diçka të tillë është përballur së fundmi Olta Boka dhe me këtë rast këngëtarja ka vendosur të japë një mesazh. Dikush prej ndjekësve në rrjete sociale i ka dërguar këngëtares një mesazh fyes, që lidhet me pamjen e saj të jashtme. “Na i shpife me ato dhëmbët të ndarë. As vetes tënde nuk i bën yzmet”, ka shkruar ndjekësi. Pavarësisht se Olta nuk ndikohet nga të tilla mesazhe, ajo nuk ka nguruar që t’i kthejë personit në fjalë një përgjigje publikisht. “A mjafton një mesazh i tillë për të të prishur ditën? Nëse e njeh veten mjaftueshëm, nëse e pranon veten siç je dhe mbi të gjitha ke mësuar ta duash veten bashkë me ato imperfeksionet që konsideron ‘Andi’, atëherë jo! Unë Andi jam shumë e lumtur me veten time dhe madje nuk konsideroj asnjë gjë të shpifur tek dhëmbët e hapur, por më duket e shpifur goja e palarë që nxjerr helm sa herë ka mundësi! Fillo të kuptosh se çfarë është në të vërtetë yzmeti! Këtë të fundit ja bëj vetes si fillim në shpirt pastaj jarebi filloj të mendoj se si ‘t’ja bëj qejfin’ Andit. Unë jam më shumë se dëshira jote për të më projektuar ndryshe!”, është përgjigjur Olta.
Më pas ajo ka dhënë një mesazh drejtuar të gjithëve, duke kërkuar që njerëzit të kuptojnë peshën e fjalës dhe të mos ju bëjnë keq të tjerëve. /revistawho.com
