Këngëtarja e njohur nga Kosova, Rona Nishliu ka ndarë së fundmi një video të një italiani i cili shpreh mirënjohjen e tij ndaj shqiptarëve pas gjestit të bërë nga qeveria e Shqipërisë, për të nisur atje 30 mjekë dhe infermierë në këtë situatë kritike.
“Corona e preku deri në rrënjë Italinë, por italianët u përgjigjën me muzikë e shpresë, ballkone plot njerëz. Në ndihmë ju shkoi dhe ekipi mjekësor nga shteti shqiptar, shtet i vogël e pa shumë mundësi, por me zemër e dëshirë të madhe për t’ia zgjatur dorën fqinjëve. Dhe ky zotëri në video ka zgjedhur të falenderojë me himnin tonë kombëtar, luajtur në flaut. Prekës ky moment vlerësimi, sikur shumë e shumë komente mirënjohje nga mijëra të tjerë, që duartrokitën kontributin shqiptar. Ky njeri i mirë, ndër të tjera thotë ‘shqiptari është si ai shoku që edhe kur ka 1 euro në xhep, ta jep’. Lutemi që Italia të shpëtojë nga ky mankth e t’i kthehet gjallëria e gëzimi sa më parë. Ditë të mira do të ketë prapë”, ka shkruar Nishliu krah postimit të fundit në rrjetet sociale, ku nuk ka fshehur se sa shumë është prekur nga ky gjest.
Edhe personazhe të tjerë të njohur kanë bërë thirrje për solidarizim në këto ditë të vështira, duke i theksuar të gjithëve se gjithçka do të kalojë dhe do i kthehen normalitetit./revistawho.com
https://www.instagram.com/tv/B-XNpGRF4dW/?igshid=qt77c6ou39cb
