Bes Kallaku ka zgjedhur sinqeritetin në daljen e tij të fundit publike, gjatë një interviste me Grida Dumën, ku ka ndarë mendime të rralla mbi jetën personale, kapitujt e mbyllur dhe mënyrën se si sot e sheh veten dhe të ardhmen.
Pa u ndalur te detajet e divorcit nga Xhensila Myrtezaj, aktori e bëri të qartë se për të, ajo periudhë i përket së shkuarës dhe nuk është më pjesë e rrugëtimit të tij aktual. Sipas tij, fokusi është te e tashmja dhe te ajo që po ndërton çdo ditë.
“E shkuara ime është e vdekur. Unë po jetoj të sotmen”, u shpreh Kallaku, duke theksuar se nuk e sheh veten si dikë të jashtëzakonshëm, por si një njeri të zakonshëm që ka lënë gjurmë pozitive te të tjerët.
Në bisedë, ai ndau edhe zhgënjimet që ka përjetuar nga njerëz të afërt, duke pranuar se jo gjithmonë mirësia shpërblehet. Megjithatë, mesazhi i tij mbetet shpresëdhënës: edhe errësira më e gjatë ka një fund.
Pika e tij më e fortë, sipas aktorit, janë familja dhe besimi. Ai theksoi se fëmijët, prindërit dhe lidhja me Zotin janë shtyllat që e mbajnë të qëndrueshëm në çdo sfidë.
“Zoti është me mua, kush mund të jetë kundër meje?”, tha ai, duke kujtuar se jeta nuk duhet marrë asnjëherë si e mirëqenë.
