Arian Çani e ka thënë dhe e ka rithënë disa herë vitet e fundit që ka ndërprerë çdo marrëdhënie me Edi Ramën dhe ata nuk flasin më. Nuk ka fshehur as qëndrimin e tij jo shumë pozitiv ndaj kryetarit të PS-së dhe Kryeministrit të Shqipërisë. Megjithatë sot ata do të flasin dhe madje para gjithë publikut të Zonë e Lirë në TV Klan që, me siguri, do jetë i madh në numër tani që është mësuar që në atë studio kthehet, pas tetë vitesh, Edi Rama.
Revista ‘Class’ ka konfirmuar lajmin që po qarkullonte në media gjatë ditës së sotme.
Kryeministri Rama do të jetë para gazetarit Arian Çani. Megjithatë pak minuta më parë edhe Rama ka shkruar në profilin e tij që do të jetë i pranishëm në studion e TV Klan. ” Sonte pas shumë motesh do rishfaqem me urdhër nga lart, dmth nga Endri Fuga, në Zonën e Lirë të Arian Çanit”, shkruan Rama.
Në periudhë fushate mund të ndodhë gjithçka! Edhe pse këtu duhet përshëndetur dhe vendosja e çështjeve profesionale mbi ato personale.
Sonte, në Zonë e Lirë, i ftuar Edi Rama. Duket se, mbi të gjitha, do të tërheqë vëmendjen sjellja e Kryeministrit dhe Çanit.
