Jeta personale e ish-banores së “Big Brother VIP Albania”, Egli Tako, duket se vazhdon të mbetet në fokus të mediave rozë dhe të rrjeteve sociale. Pas ndarjes së bujshme nga këngëtari Gjesti, emri i saj është përfshirë sërish në një valë spekulimesh që lidhen me një romancë të mundshme me një tjetër ish-banor të formatit, Redon Beranin.
Dyshimet janë ndezur nga disa postime në rrjetet sociale që fansat i kanë interpretuar si “shenja” të përbashkëta. Vëmendjen e ndjekësve e ka tërhequr veçanërisht një makinë luksoze. Redon Berani ka publikuar një foto ku shfaqet pranë një fuoristrade të zezë Mercedes G-Class, ndërsa në postime të tjera në Instagram Egli Tako është parë gjithashtu pranë një automjeti të ngjashëm. Madje, një nga fotot e Eglit, ku ajo shfaqet e ulur brenda një makine, është interpretuar nga fansat si një tjetër “provë” që mund të lidhë dy ish-banorët e BBVA.
Megjithatë, deri në këtë moment asnjëri prej tyre nuk ka reaguar publikisht për këto aludime, duke lënë gjithçka në nivel spekulimesh nga ndjekësit në rrjet. Kujtojmë se Egli Tako dhe Redon Berani krijuan një raport shumë të afërt dhe miqësor në ditët e para të qëndrimit në shtëpinë e “Big Brother VIP Albania”, por rrugëtimi i tyre u ndërpre pasi Redoni vendosi të largohej nga formati për shkak të presionit të përjetuar.
Vetëm pas daljes së tij nga shtëpia, Egli nisi romancën e saj me Gjesti-n, një histori që tashmë duket se i përket së shkuarës, ndërsa fansat vazhdojnë të kërkojnë përgjigje për kapitullin e ri të mundshëm në jetën e saj sentimentale.
