Këngëtarja me origjinë shqiptare, Eleni Foureira, dhuroi një mbrëmje të paharrueshme në Teatrin e Nicës mbrëmjen e së mërkurës, ku skena u pushtua nga energjia e saj shpërthyese dhe nga ovacionet e një publiku të zjarrtë që nuk reshti së kënduari dhe duartrokituri.
E njohur për performancat e saj dinamike dhe stilin e veçantë, Foureira nuk zhgënjeu as këtë herë, duke sjellë një spektakël që do të kujtohet gjatë. Fansat shprehën entuziazmin e tyre me mijëra video dhe imazhe të shpërndara në rrjetet sociale, duke dokumentuar momentet më të veçanta të koncertit.
Një moment që është bërë viral në TikTok ndodhi gjatë një ndërveprimi me publikun, kur Foureira, me humor dhe krenari, tha:
“Prit, e kam unë. I bëj të gjitha vetë… jam shqiptare.”
Ky reagim shkaktoi një shpërthim të qeshurash dhe duartrokitjesh nga të pranishmit, duke treguar lidhjen e ngushtë të artistes me rrënjët e saj.
Eleni Foureira, e cila ka ndërtuar një karrierë të suksesshme në skenën ndërkombëtare të muzikës pop, vazhdon të mbetet një figurë tejet e dashur në rajon. Përveç talentit të saj të shumëanshëm, ajo dallohet edhe për mënyrën e natyrshme se si shpreh krenarinë për origjinën e saj shqiptare.
