Prej fitores së saj në “The Voice of Italy” kanë kaluar 3 vjet, por që nga ajo kohë, 25-vjecarja nga Shkodra vazhdon të përgatitet për një rol shumë të rëndësishëm në jetën e saj. Musical-i “Notre Dame de Paris” është tashmë në fazën e fundit të produksionit dhe pritet që premierën ta ketë më 23 Nëntor në Pallatin e Kongreseve në Paris. Shqiptarja Elhaida Dani do të jetë dublantja e Esmeraldës dhe për këtë ditë duket se ka punuar fortë.
Sic tregon shkodrania në një intervistë për ‘Top Channel’, ajo ka “luftuar” shumë për këtë rol, i cili iu besua që një natë pas finales së “The Voice” Elhaida tregon se i është dashur të kalojë audicione të tjera, pavarësisht se Riccardo Cocciante, kompozitori i veprës e kishte zgjedhur vetë.
“Jam shumë e lumtur për këtë rol. Që pas fitores në “The Voice of Italy”, kur u ula për darkë me Cocciante-n, ai më tha që ta merrja këtë rol të rëndësishëm në rikthimin e “Notre Dame de Paris” në Francë, aty ku edhe ka lindur kjo histori e Viktor Hygo. U ndjeva shumë e nderuar dhe fillova punën menjëherë”,- u shpreh Dani..
“Shkolla që unë kam bërë ka qenë muzikologjia. Musical-in e njihja, e doja shumë, por asnjëherë nuk kam pasur eksperienca me të, ndaj kur shihja në audicione profesionistë të kësaj fushe, pyesja veten: A do ia dal? I jam dedikuar plotësisht përgatitjeve. Kam pasur orë e orë me prova, në recitim, në gjuhën frënge, etj. Kam humbur madje 10 kilogramë”,- ka rrëfyer me të qeshur, parapërgatitjet Elhaida.
Musical-i i “Notre Dame de Paris” është përkthyer në disa gjuhë të botës dhe është luajtur në shumë skena të botës nga artistë të ndryshëm. Por varianti origjinal i kastit që e ka interpretuar në vitin 2008 në Paris, me kompozimin e Riçardo Cocciante, është ai që mbahet mend më shumë.
