Shqiptari Izmir Smajlaj renditet i 21-të në olimpiadën e Rios në kërcim së gjati. Shkodrani 23-vjeçar kërceu 7 metra e 72 centimetra në garat kualifikuese, më pak nga rekordi kombëtar 8 metra e 3 centimetra, që mbahet nga vetë ai
Përfundon këtu aventura e Smajlajt në këto lojra olimpike, i renditur i 21 duke lënë pas vetes 11 sportistë të tjerë. 12 të parët në këto kualifikuese kaluan në turin tjetër, ndërkohë që i pari në prova ishte kinezi Jianan Vang me 8 metra e 24 centimetra, i ndjekur nga amerikani Xhef Henderson dhe uruguiani Lassa, shkruan Top Channel.
Tashmë është Luiza Gega përfaqësuesja e vetme shqiptare në këto lojra olimpike, e cila rreth orës 15:15 do të garojë në 3000 metra me pengesa, ku do të kërkojë kualifikimin për në finalen e madhe të 15 Gushtit.
Kjo është hera e parë që Luiza Gega, e cila është dhe nënkampionia e Evropës në këtë disiplinë merr pjesë në një olimpiadë.
