Në maj 2022, emisioni i famshëm “The Ellen DeGeneres Show” përfundoi pas 19 vitesh transmetim. Me komedianen Ellen DeGeneres në krye, emisioni u bë një nga shfaqjet më me ndikim në televizionin amerikan, si dhe u nominua për Emmy 171 herë, me 61 fitore dhe mesatarisht 2.5 milionë shikues në ditë. Arsyet për anulimin dyshohet se përfshinin akuza për racizëm dhe një kulturë toksike pune. DeGeneres, në atë kohë, tha se po largohej nga shfaqja sepse “nuk është më një sfidë për mua”.
Së fundmi DeGeneres i është rikthyer temës gjatë një turneu në shfaqjen e saj të komedisë, ‘Ellen’s Last Stand– Up Tour’.
Gjatë një shfaqjeje në një klub kabare në Los Anxhelos, aktorja ndau përvojën e saj me publikun, duke shpjeguar se si i përjetoi akuzat dhe se si skandali shënoi largimin e saj nga spektakli televiziv.
“Më kanë përjashtuar dy herë televizioni. Më në fund do të më përjashtojnë për të tretën herë sepse jam e keqe, e vjetër dhe lesbike”, tha me shaka drejtuesja e “The Ellen DeGeneres Show”.
“Ishte një goditje e madhe për egon dhe vetëvlerësimin tim. Ka kaq shumë ekstreme në këtë biznes: njerëzit ose ju duan dhe ju admirojnë ose ju urrejnë. Dhe ata njerëz, në një farë mënyre, janë më të zhurmshëm. Mendova, ‘Kjo nuk është mënyra se si doja ta mbyllja karrierën time, por kështu po përfundon”, tha ajo.
