Elvana Gjata udhëton drejt Stambollit, nis xhirimet për projektin e ri në qytetin turk

Muajt e fundit Elvana Gjata ka qenë aktive në muzikë dhe njëkohësisht është marrë me projekte të tjera mjaft të rëndësishme. Rreth 3 muaj më parë në kinematë e Tiranës u shfaq premiera e filmit “2 gisht mjaltë”, në të cilin Elvana ka rol kryesor së bashku me Ermal Mamaqin. Ky film rezultoi mjaft i suksesshëm dhe tashmë Elvana ka filluar të mendojë sërish për muzikën. Së fundmi “Prive” ka mësuar se këngëtarja ka nisur punën për publikimin e dy projekteve të reja muzikore. Elvana ka udhëtuar drejt Stambollit për të xhiruar një nga këngët e saj, e cila pritet të jetë një hit i bukur vere. Gjithashtu sipas “Prive” kënga tjetër e Gjatës do të jetë në bashkëpunim me një artist të njohur, por ende nuk dihet se për kë bëhet fjalë. Kujtojmë se përpara pak muajsh Elvana publikoi këngët “Tavolina e mërzisë” dhe “Pa dashuri”, që publiku i prit mjaft mirë, si çdo projekt tjetër të sajin. /revistawho.com