Sonte ishte premiera e programit më të ri në kanalin T në Digitalb, “M’fal për shprehjen”. Protagonisti i tij, aktori Elvis Pupa, pas përfundimit ka pyetur ndjekësit e rrjeteve sociale se si iu duk shfaqja, duke pranuar edhe vërejtjet. Sigurisht që ka marrë plot përgjigje, dhe shumica e komenteve deri më tani ishin pozitive, vetëm se pjesës më të madhe programi i është dukur i shkurtër. Jo të paktë ishin edhe ata që shfrytëzuan rastin për të shprehur revoltën, se për shkak të kohës së keqe ishin pa energji elektrike e nuk e ndoqën dot. Elvis Pupa është një aktor i dashur i humorit. Ai u bë i famshëm në Shqipëri falë roleve të tij në varietenë e Top Channel, “Portokalli”. Prej vitesh Pupa ishte vendosur bashkë me të shoqen në Shtetet e Bashkuara të Amerikës. Ishte programi i ri në Digitalb që e risolli në Shqipëri.
