Aktori i njohur Elvis Pupa ka reaguar sërish publikisht përmes një videoje të gjatë në Instagram, në lidhje me lajmet që flasin për përfshirjen e tij në një aktivitet të paligjshëm në Australi.
Në këtë video, Pupa ndalet tek fëmijëria e tij dhe presioni për të qenë “perfekt”, duke e lidhur këtë me mënyrën se si është rritur dhe pritshmëritë e prindërve të brezit të tij:
“Të gjithë synojnë të jenë perfektë. Unë kam lindur në fund të viteve ’70 dhe të jetoje fëmijërinë tënde në vitet ’80… obobo… Gjithmonë na thoshin: “Mos fol, ha çfarë të kemi vendosur ne përpara”. Por atëhere, lale, s’kishe shanse të gaboje, të mos guxoje të gaboje, sepse atëherë nuk ishe njeri, ishe turpi i familjes, turpi i fisit, turpi i shoqërisë, turpi i shkollës dhe turpi i lagjes…”
Ai përshkruan një brez prindërish të rreptë dhe përkushtimin ndaj pamjes së jashtme dhe “perfeksionit” si normë edukimi:
“Prindërit tanë ishin perfeksionistë. Ata po… Perfeksionizimi ishte i tipit që një fjalë ta thoje gabim, prindërit nuk të flisnin me gojë për një javë, madje nuk të shihnin me sy…”
Në vijim të videos, Pupa shpjegon se ky lloj perfeksionizmi nuk është virtyt, por një barrë emocionale:
“Perfeksionizmi nuk është virtyt. Është një helm emocional, por emër trendi. Nuk është ambicie, vëlla. Nuk është sukses, por është një zë brenda kokës që të thotë gjithmonë: “Ti nuk je duke bërë akoma mjaftueshëm”…”
Duke e lidhur këtë analizë personale me situatën aktuale, ai mbyll videon me një qëndrim të prerë ndaj publikut:
“Nuk e them këtë për miratim, as nuk më intereson mendimi juaj, sepse jeta ime personale është personale. Nuk më keni borxh asgjë e as unë ju. Aspak!”
Ndërkohë, hetimet në Australi për çështjen ku përfshihet emri i tij, vijojnë. Sipas mediave australiane, autoritetet dyshojnë se Belina Pupa, bashkëshortja e aktorit, ka qenë e përfshirë në kultivimin e lëndëve narkotike dhe përdorim të paligjshëm të energjisë elektrike në banesën e tyre në Adelaide.
