Emina Çunmulaj: I ngjyrosa dhomën e punës me rozë, kështu ia dhashë bashkëshortit lajmin për vajzën

Emina Çunmulaj po shijon në maksimum pritjen e saj të ëmbël, dhe ardhjen në jetë të vogëlushes e pret me entuziazëm edhe bashkëshorti i saj, Sam Nazarian. Modelja, duke folur për “Grazia”, zbulon edhe përjetimin e partnerit të saj kur mësoi se do të bëheshin me vajzë. “E pres me padurim Eminën e vogël. Kur ajo të vijë në jetë, bashkëshorti im do e ketë primare, ndërsa unë do duhet të jem gjeneralja”, ka thënë modelja. Shqiptarja, e cila u martua me multimilionerin amerikan me prejardhje iraniane në një ceremoni luksoze në Meksikë, ka thënë se në të vërtetë Sam kishte dashur të bëheshin me djalë. “Sam sapo ka mbushur 40 vjeç dhe ishte momenti që ai të bëhej baba. Ka qenë shumë i surprizuar, por lumturia nuk ka fund”, tregon Emina, e cila vijon: “Vendosa që bashkëshortit t’i bëj surprizë: ngjyrosa dhomën e tij të punës me rozë. Kur erdhi nga rruga dhe pa dhomën, ai mendoi se kisha bërë një zgjedhje Ballkani. Sinqerisht ai priste djalë, megjithatë u gëzua tej mase edhe që do të kishim një vajzë. Filloi të më përqafojë, ndërsa tani pret me padurim të vijë në jetë ajo”.