Përfaqësuesja e Shqipërisë në “Eurovizion”, Eneda Tarifa, ka thënë sot në një intervistë për “Bluetooth” se është e ndjerë e paragjykuar që kur u shpall fituese e Festivalit të Fundvitit në “RTSH”. “Gjykimet nisën që kur u fitua çmimi, kështu që unë jam tashmë e gjykuar dhe e paragjykuar. Por mua kjo pjesë nuk më shqetëson, jam e përgatitur. Dua që me thjeshtësi dhe përulësi të bëj punën time, pa u bazuar tek asnjë nga gjykimet personale, vetjake, profesionale, të atyre që kanë apo s’kanë shije, për këngën apo muzikën, apo për mua si person. Unë dua të bëj punën time dhe ta konsideroj këtë si një eksperiencë shumë të mirë për veten dhe për karrierën time. Do bëj të pamundurën për të gjithë, edhe për ata që nuk më përkrahin, edhe për ata që vjellin. Kjo është puna ime dhe unë do ta bëj njëlloj”, – është shprehur Eneda duke saktësuar në fund të intervistës së nuk është përgjegjësia e saj dhe as e realizuesve të këngës, nëse nuk ia dalin të kalojnë në finale. “Nuk ka lidhje me përgjegjësinë time, apo me cilësinë e këngës. Unë po ju them se cilësia e këngës është tjetër gjë, ajo që është e rëndësishme është votimi, gjithçka varet nga votimi”, – ka përfunduar Tarifa.
Eneda Tarifa u shpall fituese e “Fest 57” me këngën “Përrallë”, duke marrë kështu të drejtën për të na përfaqësuar në Festivalin Europian të Këngës, që do të mbahet gjatë muajit maj në Suedi.
