Nëse ka një fustan a bluzë që nuk i pëlqen apo bën, ajo e tjetërson në një tjetër veshje. E sajon vetë modelin e pastaj kërkon ndihmën e ndonjë rrobaqepëse profesioniste për t’i dhënë tegelin e fundit. Tulin e bukës që nuk preferon ta hajë, nuk e çon aspak dëm. I hedh pak vinovil, e krijon me të një masë të ngjashme me plastelinën për të krijuar bizhu të ndryshme e mbajtëse çelësash. As lëvozhgat e fëstëkëve nuk i flak, por realizon me to lule e dekore të ndryshme. Krijon kartolina, pikturon e stilon, riciklon…
Ndoshta të gjitha këto mund të duken të çuditshme, por për një vajzë krijuese si Eni Dare janë bukë e djathë. Duken si një lojë fëmijësh, por Eni i ka shndërruar vit pas viti në punë mirëfilli artistike. I ka prezantuar tek të tjerët në forma nga më të ndryshmet, herë pas here edhe me ndjekësit në rrjetet sociale, krijimet e saj.
Ka plot dhe nga ato që i ruan brenda ndonjë “kutie magjike”, ndoshta për të nisur t’i zbulojë në ndonjë program televiziv, si një paketë kuriozitetesh a këshillash praktike për vajzat pasionante e krijuese si ajo. S’do të ishte çudi, për aq kohë sa ajo po publikon pa fund në ‘Instagram-in’ e saj lajmin se tashmë është bërë pjesë e stafit të një televizioni të madh e të ri që po hapet në Tiranë, të ‘Euronews Albania’. S’na ka thënë nëse do të jetë në ekran apo pas kamerave. S’na tregon as nëse do të shkojë atje bashkë me punëdoret e saj, për të bërë më në fund bashkë dy pasionet më të mëdha të jetës, ekranin dhe kraftet. Kur e pyesim, si përgjigje na jep vetëm atë buzëqeshjen e saj karakteristike, të cilën mund ta marrim lehtë edhe si një konfirmim të nënkuptuar./revistawho.com
