Në natën e sotme të Festivalit të 64-të të Këngës në RTSH, publiku përjetoi një moment të veçantë emocionesh, teksa u akordua Orkestrës së Rdio Televizionit Shqiptar “Çmimi i Karrierës”, një vlerësim i dedikuar kontributit të jashtëzakonshëm dhe të pandërprerë ndër vite në historinë e këtij festivali.
Çmimi u dorëzua nga drejtoresha e Përgjithshme e RTSH-së, Eni Vasili, e cila në fjalën e saj vuri në dukje rolin thelbësor të një institucioni artistik që ka qenë i pandashëm nga Festivali i Këngës që nga themelimi i tij.
“Jemi në momentin për të dhënë Çmimin e Karrierës, një çmim shumë i rëndësishëm për të vlerësuar kontributin. Sot duam të nderojmë një artist të veçantë, i cili ka qenë prezent në çdo festival dhe e ka shoqëruar këtë event për 64 vite rresht. Pa të, ndoshta ky festival nuk do të ishte bërë kurrë. Çmimi i Karrierës i shkon Orkestrës Simfonike të RTSH-së”, u shpreh Vasili.
Orkestra Simfonike e RTSH-së mbetet një nga shtyllat kryesore të Festivalit të Këngës, duke shoqëruar ndër dekada qindra këngë, artistë dhe kompozitorë, si dhe duke kontribuar ndjeshëm në formësimin e identitetit muzikor të këtij eventi kombëtar.
Prania e saj e pandërprerë për 64 vite përfaqëson një histori përkushtimi, profesionalizmi dhe dashurie për artin, ndërsa ky vlerësim shërben jo vetëm si një falënderim për të shkuarën, por edhe si një nderim për rolin që Orkestra Simfonike e RTSH-së vijon të ketë në jetën artistike dhe kulturore të vendit.
