Arti është një oqean i madh, po aq e madhe dhe bota që e rrethon. Mes të bukurës, unikes dhe asaj që na vesh pamjen e shpirtin, tentojmë të gjejmë një copëz që na krijon dimensionin tonë. Te flokët gjejmë prehjen e çdo gjëje tonën. Gjejmë buzëqeshje miksuar me sytë, me fytyrën, gjejmë gjithçka.
Në mes të pasqyrës përmes së cilës Eni i sheh flokët, vendosi të merret pikërisht me ta. Kush nuk e njeh Eni Xhixhon? 30-vjeçarin me shpirtin e bukur e duart e arta. I diplomuar në akademinë “Schwarzkopf”, Eni në rrugën e tij vuri tri qëllime “punë, punë, punë”. Kështu me trajnimet në Dubai, Francë, Itali e Turqi, ai krijoi patentën e duhur për të qenë i sigurt, i formuar, i qartë se po krijonte kornizën perfekte. Në vitin 2017, hapi sallonin e tij dhe sot, pas 5 vjetësh numërimi për sukseset ka humbur fillin e tij. Numëron dhjetra bashkëpunime me figura të njohura, që flokët ia besojnë duarve të arta të Enit.
Një aventurë e re është tanimë në rrugën e Eni Xhixhos. Ai është përzgjedhur si një prej prej 25 parukierëve të rinj më influencues në botë. Natyrisht në rrugëtimin e tij nuk mbetet pas “Schawarzkofpro.albania”, që i ka dhënë atij mundësinë, vlerësimin dhe besimin, trioja që ndryshon botën. Në datat 25-26 tetor 2022, do të jetë “live” nga Hamburgu, shtëpia e madhe e “Schwarzkopf Professional”. Flokët mund të mos kenë shpirt, por Eni lë shpirtin për të krijuar më të bukurën aty, për këdo, kudo, kurdo. Shqipëria ka një përfaqësues të denjë, për të krijuar të bukurën dhe për të lënë gjurmë…
