Teatri Kombëtar ka publikuar në faqen e tij, një spot për të bërë publike të gjitha shfaqjet që do të vihen në sezonin e ri. Janë tetë shfaqje që nisin që nga antikiteti dhe nuk mungojnë as ato bashkëkohoret, me regjisorë shqiptarë e të huaj, por të gjitha janë vepra ndërkombëtare. Asnjë dramë shqiptare, nuk do të ketë sezoni i ri. Ky fakt mesa duket e ka ngacmuar aktorin, regjisorin dhe autorin e njohur nga Kosova, Enver Petrovci për të komentuar në spot, shkruan “Class”.
“Nuk po kuptoj i kujt eshte ky teater “Kombetar” kur asnje drame nuk eshte kombetare. Une i kuptoj regjisoret shqiptar pse nuk i vendodin dramat kombetare sepse nuk kane mundesi me vjedhe regjiat e shfaqjeve nga youtoobe. Prandaj nuk kane guxim ti vendosin dramat kombetare. I dashur drejtor i TK mos hyni ne keto kurtha te regjisoreve hajdut. Me e mire eshte nje shfaqje mesatare me drame kombetare se sa nje shfaqje e “mire” e vjedhur nga interneti”, shkuan ai.
Komentit i është përgjigjur vetë drejtori i TK, Hervin Çuli. “…jam pergjigjur disa here se nuk kam pothuajse fare qasje te regjisoreve me dramen shqipe…Si mendon ti Enver i dashur tu imponohem regjisoreve ne perzgjedhjen e tyre.Enver une mendoj se drame shqipe apo e huaj TK duhet te flase bukur shqip”, shkruan Çuli.
“Dhe thuaj ndonje llaf te mire Enver per perpjekjet qe kemi bere keto 2vjet per te rifituar publikun e humbur, per shfaqjet e shumta, per aktoret dhe regjisoret e rinj te angazhuar….Miku im te pres te shohesh shfaqje ne TK sepse kam nevoje per mendimin tend te kopjuara apo origjinale qofshin”, vazhdon ai përgjigjen.
Teatri Kombëtar, vitet e fundit, ka zhvilluar takime, laboratorë, apo netët e leximit të dramës shqipe, duke qenë që mbështetja e dramës shqiptare ka qenë një nga vizionet e Çulit në krye të këtij Teatri, megjithatë ende, ajo nuk zë një vend, qoftë edhe minimal, në repertorin e tij, duke mos u zgjedhur nga regjisorët shqiptarë. Masat e tjera për të gjetur vend në TK për dramën shqip, Çuli i konsideron imponuese.
