Pas largimit nga spektakli i humori “Portokalli”, Erion Isai vazhdoi karrierën e tij duke u angazhuar fillimisht si prezantues me Bes Kallakun në “Kënga Magjike” dhe tani si regjisor në teatër. Ndoshta kjo është mundësia e artë për Erionin që të shpalosë veten në dimensione të ndryshme. Në një intervistë për gazetën “Panorama Plus” aktori i njohur ka treguar se ndihet me fat që ka mundur të realizojë punën e tij si regjisor përkrah emrave më të njohur të teatrit në Shqipëri. Ndërsa për eksperiencën e tij si prezantues Erioni ka thënë: “Prezantimi i ‘Kënga Magjike’ më dha një kënaqësi të rrallë. Jam ndier artist dhe i vlerësuar pas shumë kohësh… më mungonte shumë ai trajtim dhe i tillë bashkëpunim.”
Ndërsa i pyetur nëse bëhet ndonjëherë nostalgjik dhe nëse e ndjek më “Portokalli” ai është përgjigjur: “Shkurt, jo! Nuk mund të bëhesh nostalgjik për ish-të dashurën kur dashuria e re është më pasionante se e vjetra. Jam i zënë duke bërë shfaqje në teatër dhe s’i kam ndjekur”.
Erion Isai pritet të nisë shumë shpejt një program televiziv me mikun e tij më të mirë Bes Kallaku. /revistawho.com
