Tani kanë një program që e drejtojnë vetë në ‘Tv Klan’, por Erion Isai, Bes Kallaku dhe Olsi Bylyku i kanë pasur fillimet e tyre nga programi i njohur i humorit ‘Portokalli’. Edhe pse kanë vite që janë larguar nga aty, aktorët gjithmonë janë shprehur mirënjohës për eksperiencën që kanë fituar nga pjesëmarrja në atë emision humori. Së fundmi, i ftuar në emisionin ‘Tempora’ në ‘Ora News’, Erioni ka folur në lidhje me largimin e tij dhe është shprehur se nuk ka qenë për shkak të ndonjë kapriçoje, por sepse kishte ardhur koha për të provuar gjëra të reja. “Më bëhet qefi që pas 2 vitesh kur u largova nga ‘Portokallia’ të flas me zë dhe figurë. E vërteta është se nuk do isha përballë teje këtu nëse nuk do ekzistonte ‘Portokallia’. ‘Portokallia’ i besoi një djali të ardhur me autobus në 3 të mëngjesit nga Erseka, skenën më të lakmuar në Shqipëri në ato vite. Largimi im nga ‘Portokallia’ nuk erdhi për shkak të ndonjë kapriçoje të një sherrnaje. Erdhi si një moment reflektimi i një artisti, me shqetësimin se unë nuk mund të jepja më shumë se kaq sa i dhashë Portokallisë në aspektin skenik. Realizimin e figurave komike ashtu siç po e bëjnë dy kolegët e mi sot, unë nuk e arrij ta bëj dot. Jam i lumtur të jem shoqëruesi i tyre në skenë”, është shprehur Erioni. Ai zbuloi gjithashtu se vëmendja e tij ishte tek regjia, skenari dhe prapavija./revistawho.com
Erion Isai shpreh mirënjohjen për ‘Portokalli’: I besuan një djali të ardhur me autobus në 3 të mëngjesit
