Moderatori televiziv Erion Zeqiraj, i cili para se të bëhej protagonist i “Big Brother 3”, ishte personazh i njohur televiziv, tashmë i është rikthyer pasionit të tij të parë, sportit. Kjo e ka ndihmuar edhe për formën fizike, pasi nga 114 kilogramë që peshonte dikur, tani ka arritur peshën 104 kg. Ai ka realizuar një set të ri fotosh artistike, ku tregon ndryshimet në fizikun e tij, pasi ka punuar shumë në palestër për të vënë edhe muskuj.
“I jam rikthyer prapë volejbollit pas tri vitesh, pasi po luaj me Tiranën dhe kjo më ka ndihmuar të kem fizikun e dëshiruar”, tha ai për gazetën “Panorama”.
Ndërsa për rikthimin në ekran, ai thotë: “Në shtator besoj do të rikthehem sërish, pasi sapo përfundova masterin në UET për Komunikim dhe Marrëdhënie me Publikun. Qejf kam që kësaj here të kthehem si prezantues i ndonjë emisioni sportiv, por të shohim deri në fillimin e sezonit të ri televiziv”.
Pas disa eksperiencave si spiker lajmesh apo prezantues emisionesh të ndryshme, Erioni u largua dhe nga televizioni ku punonte së fundmi, Televizioni Publik Shqiptar (TVSH). Sa i takon fizikut, me kalimin e viteve ra në sy fakti që Erioni mori kilogramë, duke humbur elegancën e mëparshme dhe formën e mirë fizike, për të cilën shquhej në “Big Brother”. “Arrita një moment peshën 126 kilogramë, tani jam 104 kg, por jam ende në rrugë e sipër për t’u dobë- suar edhe më shumë”.
Dieta që e dobësoi
Mëngjesi: Biskota integrale me qumësht.
Dreka/ Dita e parë: Rizoto me pulë/ Dita e dytë: Salmon me makarona/ Dita e tretë: Sallatë me biftek/ Dita e katërt: Gjellë shtëpie
Darka: Supa të ndryshme, ose kos frutash (Të gjitha me gramaturë)
Sportet: Dy herë në javë seanca El body
Ditët e tjera: Ushtrime në palestër
