Erjon Braçe: Tallavaja s’na çon në Europë, rrini me këmbë të tokë

Pas përfundimit të ndeshjes Shqipëri- Portugali e cila u mbyll me rezultatin 0- 1, deputeti i Partisë Socialiste Erjon Braçe ka publikuar një status në llogarinë e tij në Facebook. Braçe i bën thirrje shqiptarëve të qëndrojnë me këmbë në tokë e t’i harrojnë folklorizmat duke i lënë futbollistët të luajnë të qetë e pa presion. Ai e ka quajtur tallava të gjithë frymën patriotike që shfaqet kudo, në çdo ndjeshje. “Me këmbë në tokë! Sa keq, sa keq!! Bëmë lojën tonë dhe ishim të zotë deri në 30 sekondat e fundit!! Këtë herë dhe të pafat!! Nuk e meritonim!! Nuk na dominuan dot, asnjë minutë!! Por mbase bënë mirë; Na duhet të rrimë me këmbë në tokë dhe, pas atij goli na ulën me këmbë në tokë. Duhet ta mendojmë Francën në fund, kur të numërojmë pikët; jo tani, jo si e bërë, jo si e arritur. Ta mendojmë të gjithë kështu që ata djem të jenë të çliruar nga presioni. Ndaj, këtë muaj harrojeni “Shqipërine etnike”, “betejat për flamur”, “mësimet për Serbinë” apo ku di unë- çdo lloj folklorizmi patriotik që gjithherës është thjeshtë tallava, madje tallava që nuk na çon në Francë. Lërini të luajnë futboll, kaq, të luajnë futboll siç dinë ata; e bëjnë shumë mirë atë, taktikisht dhe teknikisht! Ah po; Sikur ai që u rrezua në zone të mos ishte Roshi por Ronaldo, a do ishte penallti?!”, ka shkruar Braçe.