Ditët e fundit Ermal Mamaqi së bashku me Amardën dhe fëmijët ka kaluar disa ditë pushimi në Valbonë. Të gjithë si familje ata kanë vendosur që disa ditë të nxehta të verës t’i kalojnë pranë malit në ajër të freskët. Gjatë qëndrimit atje Ermali është njohur me histori të bukura njerëzore dhe njërën prej tyre e ka ndarë me ndjekësit e tij në ‘Instagram’. Ai ka publikuar një fotografi përkrah një zotërie 84-vjeçar dhe ka treguar një histori prekëse, po aq edhe frymëzuese të burrit në fjalë. Me anë të këtij rrëfimi, Mamaqi ka dhënë një mesazh shumë të fortë për çiftet e reja, për të vlerësuar jetën dhe njëri-tjetrin.
https://www.instagram.com/p/BzU3ThGB811/
“Ky është Brah Salihi Metaliaj. Një zotni i mençur 84 vjeç nga Dragobia,Tropojë. Kaluam gjysmë dite bashkë, më tregoi histori fantastike nga këto anë dhe na priti në kullën e tij me dashamirësinë tipike të malësorit. Ajo që më bëri përshtypje nga ato që më tha ishte se Brahut i kish vdekur gruaja para 9 muajsh dhe ai e mendonte çdo ditë. Fytyra e tij merrte një shprehje mallëngjyese, por edhe krenare kur na tha: ‘65 vjet bashkë, 1 herë nuk më tha Jo ajo grua’. Brahu dhe gruaja tij e ndjerë rritën 7 fëmijë në Dragobi dhe Brahu nuk dëgjoi kurrë ankesa dhe fjalën ‘JO’. Po ti që ankohesh çdo ditë… çfarë justifikimi ke? P.s: Për çiftet e reja…”, ka shkruar Ermali në postimin e tij. Pas publikimit të historisë Mamaqi ka marrë komente shumë pozitive nga ata që kanë arritur të kuptojnë thelbin e saj. /revistawho.com
