Ermali i BB5 bëhet PR i Bashkisë Tiranë: Dua të rritem politikisht

Ish-­lojtari i “Big Brother 5”, Ermal Merdani, prej një jave është emëruar specialist i Marrëdhënieve me Publikun në Drejtorinë e Përgjithshme të Mirëmbajtjes pranë Bashkisë së Tiranës. Gjatë fushatës për zgjedhjet vendore të 21 qershorit, ai u shfaq në krahun e majtë politik pranë Erion Veliajt, i cili e ka punësuar pranë kësaj drejtorie të re në varësi të Bashkisë. “Jam i lumtur që jam pjesë e politikëbërjes së Erion Veliajt, në këtë sipërmarrje të tij, për të ndryshuar Tiranën. Drejtori Redi Molla, me të cilin punoj, është fantastik dhe shumë punëtor, ndaj jam i lumtur që jam pjesë e stafit të tij. Puna më pëlqen dhe e bëj me kënaqësi. Synimi im ka qenë dhe do të jetë të jem pjesë e filozofisë politike të kryetarit Veliaj dhe të ndjek ritmin e tij të të punuarit”. Pyetjes së “Panoramës” se cilat janë ambiciet e tij në politikë, ai përgjigjet: “Objektivi im është të rritem si figurë politike, duke ndjekur filozofinë e kryetarit jo vetëm në bashki, por edhe në karrierën që ai do të ketë në vijim, pasi jam mbështetësi i politikës që ai bën”. Angazhimet e ish­misterit Merdani vitet e fundit kanë qenë mes televizionit dhe politikës.