Sopranoja e famshme Ermonela Jaho, njëkohësisht ambasadore e YWCA në kauzën e “Fjongos Rozë”, është në Tiranë për koncertin që do të mbahet ditën e sotme në kuadër të tetorit rozë. Në konferencën e zhvilluar pak orë para koncertit, ajo zbuloi disa nga ndjesitë dhe përjetimet e saj personale. “Rikthimi në Shqipëri më sjell gjithnjë emocione të mëdha. Ngjan si klishe, por po ta shihni edhe tani po më dridhen duart”, ka treguar këngëtarja. Gjatë konferencës ajo u shpreh se ka zgjedhur të angazhohet në kauzën e organizatës YWCA si ambasadore për të ndihmuar dhe sensibilizuar çdo grua. Ermonela tregoi se gjatë jetës ka humbur shumë prej mikeve të saj nga kanceri i gjirit dhe ky fakt ka mjaftuar që ajo të ndërmerte një nismë të tillë. “Dua të shoh gjithnjë dritën në tynel. Fjongoja rozë më kujton çdo ditë se dashuria mund të shërojë”, thotë këngëtarja. Pjesë e panelit ishte edhe Dona Godaj, drejtore e “YWCA” për Shqipërinë, dy artistet e njohura, Vikena Kamenica dhe Enada Hoxha, po ashtu edhe mbesa e Ermonelës, Pantesilena Jaho, e cila është pianiste.
