Oborri Mbretëror Shqiptar ka njoftuar zyrtarisht martesën e Lartësisë së Tij Mbretërore, Princit Leka II, me Blerta Celibashin.
Sipas komunikatës zyrtare të publikuar nga familja mbretërore, ceremonia e martesës është zhvilluar në një atmosferë private, duke ruajtur karakterin intim dhe solemn të saj. Çifti ka zgjedhur që momentin e tyre të veçantë ta ndajë fillimisht vetëm me familjarët dhe rrethin më të afërt.
Fotografia zyrtare e publikuar me këtë rast është realizuar në kështjellën Apponyi në Sllovaki. Përzgjedhja e këtij vendi historik lidhet me trashëgiminë familjare të mbretëreshës Geraldinë dhe origjinën e saj hungareze, një pjesë e rëndësishme e historisë së familjes mbretërore shqiptare.
Pas martesës, Blerta Celibashi do të mbajë mbiemrin e familjes Zogu dhe titullin Princeshë e Shqiptarëve.
Në njoftim thuhet se familja mbretërore e ndan këtë lajm të gëzueshëm me popullin shqiptar dhe me miqtë e saj në mbarë botën.
