Këngëtari i njohur shqiptar, Eugent Bushpepa, ka qenë mbrëmjen e djeshme në qendër të vëmendjes në një nga skenat më të mëdha në Zvicër, në Hallenstadion, ku performoi përpara një audience prej mbi 40,000 vetash.
Bushpepa u ngjit në skenë për të hapur koncertin e grupit legjendar të rock-ut britanik, Judas Priest, duke sjellë një performancë të fuqishme që u prit me entuziazëm nga publiku. Ky është një tjetër moment i rëndësishëm në karrierën ndërkombëtare të artistit, i cili ka dëshmuar gjithnjë se zëri dhe talenti i tij kapërcejnë kufijtë.
Kujtojmë që Bushpepa përfaqësoi Shqipërinë në Eurovision në vitin 2018 me këngën “Mall”, duke marrë vlerësime të larta nga kritika dhe publiku.
Ky koncert është dëshmi se muzika shqiptare mund të ngjitet në skenat më të mëdha të botës – dhe Eugent Bushpepa është padyshim një prej ambasadorëve më të denjë të saj.
