Eugent Bushpepa do të përfaqësojë këtë vit Shqipërinë me këngën “Mall” në Festivalin Evropian të Këngës, ‘Eurovision’. Në momentin që Eugenti u shpall fitues në “Festivalin e 56 të Këngës në RTSH”, ai u shpreh se këngën dëshironte që edhe në ‘Eurovision’ ta këndonte në shqip. E në fakt Eugenti e mbajti fjalën, sepse ditën e sotme ai prezantoi versionin përfundimtar të këngës dhe gjithçka ishte shqip. Në këtë version të ri vihet re një ndryshim i lehtë notash, por kënga vazhdon të jetë po njëlloj e fuqishme. Në kanalin zyrtar të ‘Eurovision Song Contest’ në ‘Youtube’ kënga ka marrë komente shumë pozitive dhe në veçanti është komplimentuar Eugenti për zërin e tij të pakrahasueshëm.
Eugent Bushpepa do të këndojë në gjysmëfinalen e parë të Festivalit ‘Eurosong’, më datën 8 maj. /revistawho.com
