Teksa festivali i Eurovisionit afrohet dhe të gjitha shtetet pjesëmarrëse po përgatiten për netët e mëdha në Bazel të Zvicrës, Shqipëria po tërheq gjithnjë e më shumë vëmendje. Për herë të parë në historinë e saj, vendi ynë është renditur në Top 10 të pretendentëve për fitoren e festivalit sipas parashikimeve të “bookmakers”-ave të festivalit.
Kënga “Zjerm” e grupit Shkodra Elektronike po gëzon popullaritet të madh në Europë, duke u renditur në vendin e 10-të me 2% shanse për fitore—të njëjtat përqindje si Belgjika dhe Ukraina. Ky është një moment historik për Shqipërinë, e cila më parë nuk ishte parë si një konkurrente kaq e fortë në këtë kompeticion.
Në krye të renditjes aktuale qëndron Suedia, e cila ka 24% shanse për të triumfuar, e ndjekur nga Austria dhe Izraeli. Ndërkohë, mbetet për t’u parë nëse Shqipëria do të vazhdojë të ngjitet në këtë garë të fortë drejt trofeut të Eurovisionit.
