Aktorja e njohur italiane, Eva Grimaldi ka rrëfyer për herë të parë, gjatë një interviste për “Verissimo”, një nga momentet më të vështira të jetës së saj. Ajo ka treguar se rreth moshës 30-vjeçare, aktorja zgjodhi të mos e vazhdonte shtatzëninë: “Abortova, ishte e rëndësishme për mua të vazhdoja karrierën. Nuk ndihesha gati të bëja një fëmijë.”
Teksa mendon sërish dhe kthehet pas në kohë për vendimin që ka marrë, Grimaldi nuk e fsheh keqardhjen dhe hidhërimin që iu desh të bënte një zgjedhje kaq të vështirë.
“Ndonjëherë gratë, ndoshta në fillim të karrierës së tyre, e gjejnë veten duke u detyruar të zgjedhin. Unë do të doja t’u thoja zgjidhni jetën.”-tha ajo.
Artistja më tej ka rrëfyer gjithashtu se këtë vendim e ka marrë pa përfshirë babain e fëmijës, një koleg me të cilin ka pasur një lidhje të shkurtër. “Nuk doja të përfitoja nga emri i tij”, tha ajo, duke theksuar se ishte një zgjedhje që e bëri vetë.
Kohë më vonë, gjatë martesës me Fabrizio Ambroso, me të cilin ishte e martuar nga viti 2006 deri në 2010, Grimaldi ndjeu dëshirën për t’u bërë nënë, e cila megjithatë mbeti vetëm e tillë: “Kur përpiqesha të bëja një fëmijë, gjithmonë mendoja ‘më është dhënë mundësia një herë, por jo herën e dytë”.
