Të gjithë flasin për “zhdukjen” nga qarkullimi të Elvana Gjatës, dhe anulimin e të gjitha koncerteve verore, për faktin se ajo është shtatzënë. Lajmin bombastik për këngëtaren e njohur, e cila është nën menaxhimin e Flori Mumajesit dhe Andi Islamit, e publikoi faqja “Vipat e Bllokut”, duke shkruar se Elvana është shtatzënë. Nuk dihet nëse ky lajm është i vërtetë, por mbetet për t’u parë nëse këngëtarja do të bëhet nënë së shpejti, ndërkohë që ajo vetë ka vendosur të heshtë, duke mos dhënë asnjë informacion shtesë rreth jetës së saj private. Ndërkaq, menaxheri i “Threedots”, Islami, i ka përgënjeshtruar thashethemet mbi shtatzëninë e artistes, duke u shprehur: “Budallallëku i radhës. Asgjë s’është e vërtetë. Nuk është as për prononcim, aq pa lidhje është”. Por ky lajm që qarkulloi në të gjitha portalet online, kishte kohë që komentohej në rrethin e artistes, sipas një historie që Elvana po bëhet nënë nga lidhja e re me një djalë të pasur. Dyshimet për të mësuar më shumë se ç’po ndodhte me jetën e 29-vjeçares, lindën pasi ajo vendosi të anulonte të gjitha koncertet e verës, diçka që nuk e kishte bërë kurrë më parë dhe që, pa dyshim, mund ta ketë bërë e kushtëzuar nga një arsye e fortë. Por për ta ngatërruar paksa publikun, Elvana kishte përgatitur për fansat e saj një surprizë. Në momentin që të gjithë mendonin se përveç anulimit të koncerteve, po bënte pauzë edhe me klipet për arsye të panjohura personale, artistja ia behu me klipin e ri me titull “Njësoj”, në imazhet e të cilit u shfaq herë si Rihanna dhe herë si Drake. Me një pamje mjaft të kuruar, dhe në kulmin e elegancës, Elvana kishte zgjedhur kombinimin e një fundi të gjatë në ngjyrën pink me një bluzë të shkurtër. Nuk dihet ekzaktësisht se kujt ia dedikonte këto vargje të trishtuara dashurie, ndërkohë që thuhet se xhirimet e klipit janë bërë kohë më parë nga këngëtarja, kur ishte në formën më të mirë fizike. Ndërkaq, burimet të afërta të Elvanës kanë njoftuar se ajo po përgatitet që të dalë hapur me deklarime për rikthimin dhe mbi të rejat në fillim të muajit shtator.
