Pas Prime-it të fundit të Big Brother VIP Kosova, deklarata e drejtpërdrejtë e Leonora Jakupit ndaj Dolces ka nxitur një valë reagimesh jashtë shtëpisë, me fokus të veçantë te qëndrimi i familjes së saj. Përballja mes dy banoreve, e shoqëruar me ironi dhe kritika të forta, nuk është pritur aspak mirë nga familjarët e Dolces, të cilët e kanë cilësuar situatën si të panevojshme dhe fyese.
Përmes një reagimi në rrjetet sociale, familja ka theksuar se pjesëmarrja e Dolces në këtë format nuk ka qenë kurrë për përplasje personale, por për të shfaqur vlerat dhe personalitetin e saj. Ata kanë reaguar ashpër ndaj deklaratave të Leonorës, duke i konsideruar si sulme që kalojnë kufijtë e lojës.
“Kur gjykon mua, shpejt harron të kaluarën tënde. Pastaj në moshën që ke, normal që vetëm gjumi të ka ngelur”, thuhet në reagimin e familjes, një fjali që ka ndezur edhe më shumë debatet në rrjetet sociale.
