Në një moment që do të mbahet mend gjatë në historinë e këtij formati, pas eliminimit të tij nga shtëpia, Jozi humbi kontrollin dhe goditi këngëtarin Gjest me një shpullë të papritur gjatë transmetimit të drejtpërdrejtë. Pamjet u përhapën menjëherë në rrjetet sociale, duke nxitur reagime të shumta nga publiku, figurat publike dhe natyrisht – familjarët e të përfshirëve.
Pas një heshtjeje të shkurtër por të ngarkuar emocionalisht, familja e Gjestit ka vendosur të reagojë. Përmes një postimi në rrjetet sociale, motra e tij, Blerina, u shpreh mirënjohëse për mbështetjen e marrë nga publiku.
“Në pamundësi për t’i kthyer gjithë mesazhet e dërguara për aktin fizik ndaj Gjestit, ju jemi mirënjohës ne si familje për gjithë mbështetjen dhe dashurinë që e keni treguar për të,” – ka shkruar ajo në Instagram.
Në rrjete sociale, ndjekësit e “BBVA” kanë shpërndarë mesazhe solidariteti, ndërsa të tjerë kanë kritikuar ashpër reagimin e Jozi-t, duke kërkuar përjashtim të përhershëm nga çdo format i ardhshëm televiziv.
Produksioni i spektaklit reagoi menjëherë duke e dënuar aktin dhe kërkuar falje publikut për momentin “e papranueshëm dhe të paprecedentë”, siç e cilësuan vetë ata. Jozi u shoqërua menjëherë nga efektivët e sigurisë, ndërsa rrjeti shpërtheu në komente që varionin nga shqetësimi i sinqertë te indinjata kolektive.
