Programi “Dua të të bëj të lumtur” i Arbana Osmanit mbrëmjen e sotme na riktheu pas në kohë në vitet e luftës së përgjakshme të Kosovës duke na rikujtuar plagët e lëna pas prej saj. Në program u trajtua historia e dhimbshme e një prej shumë familjeve që u detyruan të lënë shtëpitë e tyre dhe të vendosen në Shqipëri. Familja Bytyçi rrëfeu në studio rrugëtimin e gjatë dhe tepër të vështirë që kishin kaluar gjatë largimit nga Kosova. Xhemal dhe Ajshe Bytyçi ishin mikpritur nga familja Axhami në Kukës dhe pas një periudhe të gjatë kishin vendosur që të shpërnguleshin në Tiranë tek familja Hyseni. Kur lufta sapo kishte mbaruar, familja Bytyçi ishte nisur për në Kosovë menjëherë edhe pse vendi nuk ishte pastruar nga minat. Xhemal dhe Ajshe Bytyçi kishin zgjedhur programin “Dua të të bëj të lumtur” për të falenderuar dhe për të shprehur mirënjohjen dy familjeve që i kishin strehuar gjatë periudhës së vështirë të luftës. “Publik i dashur ky është Agim Hyseni, vëlla dhe shkuar vëllait. Ju falenderoj shumë për përkrahjen dhe pritjen që keni bërë për ne në ato dy muaj që kemi qëndruar bashkë! Ju falenderoj juve të gjithë shqipëtarëve që na ndihmuat dhe hapët dyert e shtëpive tuaja për ne!” Nga ana tjetër familja Hyseni treguan momente nga jetesa me familjen Bytyçi dhe shtuan se nuk kishn bërë gjë tjetër përveç detyrës së tyre si shqiptarë./revistawho.com
