Kurrë nuk ka qenë ushqimi më fashion se sa veshjet, dhe veshjet kurrë më të shijshme se një recetë. E kishit menduar ndonjëherë se si do të dukeshin veshjet e pasarelave në një pjatë? Ju kemi prezantuar më parë me Aden, mund ta njihni edhe përmes blogut të saj të ushqimit Adda’sAll dhe librit “Jeto, Dashuro, Ushqehu”, por vajza me pasionet e mëdha është më shumë se kaq.
Impakti i Modës dhe Ushqimit në shoqëri dhe influenca që ka secili komponent në jetën e përditshme është kthyer në një aspekt shumë interesant. Shumë koleksione po u kushtohen ushqimeve, këtu mund të kujtojmë sfilatën e Moschino-s me McDonalds apo atë Dolce&Gabbana-s ku printi tendencë ishte pizza dhe supa. Mesa duket ushqimi është si moda, i nxitur nga trendet, stinët dhe publiciteti i fuqishëm. Të sjellësh koleksionin pranveror të Gucci-t në një sallatë detox apo tapetin e kuq të Golden Globes në një petull Donut, është sa e pazakontë aq edhe interesante. Kombinimi i ngjyrave, prerjeve, copave e modeleve i rrinë perfekt dizajnit të pjatës me ravioli apo një antipaste me mortadela dhe pjepër.
Nëse do të ishte në një vend shumë më të madh se Shqiperia, ku mundësitë për t’u promovuar do të ishin më të mëdha e premtuese, Adën ndoshta do ta shihnim në bashkëpunim me Leandra Medine për Man Repeller ose krah Chrissy Teigen, modeles së famshme e njohur gjithashtu edhe për pasionin e saj mbi gatimin. Udhëtimi gastronomik në viset e largëta dhe të afërta, aroma që të kujton shtëpinë dhe çdo gjë tjetër që shkon përtej inspirimit, do t’i gjeni në punët e vajzës nga Tirana dhe fotove që ajo ndan me të gjithë në instagram. E vërtetë që fjalët ndonjëherë janë të tepërta prandaj shfletoni galerinë dhe inspirohuni nga projekti më i veçantë, “Fashion Food” i Adda’sAll!
Marre nga Class
