Festivali i Filmit në Kanë, i njohur për shkëlqimin dhe vëmendjen që tërheq nga yjet e famshëm të kinemasë dhe modës, këtë vit po shënon një kthesë të papritur në rregullat e tij.
Në vend që vëmendja të përqendrohet tek fustanet zbuluese që shpesh dominonin tapetin e kuq, organizatorët kanë vendosur të ndryshojnë qasjen. Për edicionin e sivjetshëm, i cili nis të martën me filmin “Leave One Day” nga regjisorja franceze Amélie Bonnin, është miratuar një rregullore e re që ndalon ekspozimin e tepërt në emër të etikës dhe respektit.
“Nga arsye mirësjelljeje, zhveshja është e ndaluar në tapetin e kuq, si dhe në çdo zonë tjetër të festivalit”, thuhet qartë në një dokument zyrtar të lëshuar nga vetë festivali.
Kjo masë është marrë për të frenuar trendin në rritje të veshjeve “gati të zhveshura” që, sipas organizatorëve, kanë filluar të spostojnë vëmendjen nga kinemaja në spektakël.
“Ekipet pritëse të festivalit do të jenë të detyruara të ndalojnë hyrjen në tapetin e kuq për këdo që nuk respekton këto rregulla”, paralajmërohet më tej në të njëjtin dokument.
Rregullorja e re është pjesë e një udhëzuesi më të gjerë për sjelljen e pjesëmarrësve, e cila ka për qëllim të rikthejë dinjitetin dhe thelbin artistik të ngjarjes.
Ngjarjet më të rëndësishme të festivalit do të zhvillohen si zakonisht në Grand Auditorium Louis Lumière, ku të ftuarit do të jenë nën vëzhgim të rreptë për respektimin e etikës së re të prezantimit.
Këtë vit në Kanë, kamera mund të jenë ende të shumta, por mesazhi është i qartë: më pak zhveshje, më shumë kinematografi.
