Këngëtarja e njohur e muzikës popullore, Maya Aliçkaj, pak ditë më parë ka prezantuar këngën e saj më të re, “Ti, ngadalë”, një fabul reale në jetën e çdo çifti, kur dikush nga partnerët “llastohet” e gabon pa dashje.
Bashkëpunimi me Adrian Hilën, besniku i këngëtares vlonjate, edhe këtë herë ka rezultuar i suksesshëm, por risi në klipin e kësaj kënge është Qetsor Ferunaj, ai që të gjithë e njohim si fituesin e Big Brother 2, por pakkush e dinte që me këngëtaren vlonjate ka një lidhje familjare.
Këtë e ka zbuluar vetë këngëtarja e ftuar në studion e “Rudina”, ku ka folur më shumë për klipin e ri dhe prapaskenat e tij: “Interesant klipin e bën edhe prania e fituesit të Big Brother, Qetsor Ferunaj, i cili është partneri im…” – tregon Maya duke shtuar se zgjedhja e tij është bërë për dy arsye: “Qetsorin e zgjodha për dy arsye. Është një personazh shumë karizmatik, i mësuar me kamerat dhe e dyta, sepse e kam nipçe, djalin e kushërirës”, – tregon ajo.
Një pjesë të mirë të familjarëve, por edhe fisit, Maya i ka përfshirë gjithmonë në klipet e saj, por Qetsori është i njohur për publikun, ndaj prania e tij në klip zgjon më shumë interes. Megjithatë, Maya ka pasur edhe një merak në rastin e Qetësorit: “I them shpesh ‘mos më thuaj teze, se je i madh’” – tregon ajo me humor duke theksuar edhe një herë komoditetin me të cilin ka punuar me Qetsorin.
