Moderatorja e njohur e ‘Fiks Fare’ Fiori Dardha ka konfirmuar lajmin që doli një ditë më parë për “Summer Pages” në “Gazeta Shqiptare” për largimin nga ky emision investigativ. “Konfirmoj largimin, por për detaje të tjera duhen pyetur drejtuesit e ‘TCH’”, është shprehur Fiori Dardha për “GSH”. Nuk dihen ende arsyet e vërteta të largimit të dy prezantuesve, duke lënë gjithçka një mister. Ishte Olti Curri, që në “Facebook” postoi dje lajmin rreth ndryshimeve në këtë televizion. “Largohen nga moderimi i ‘Fiks Fare’, çifti simpatik Fjori Dardha dhe Gent Pjetri (Doktori). Është lajm i minutave të fundit nga lëvizjet e reja në programacionin e ‘TCH’, ku mësohet se dyshja e konsoliduar e ‘Fiks Fare’, Fiori dhe ‘Doktori’ nuk do të jenë më në drejtimin e këtij emisioni. Mësohet nga zëra brenda redaksisë se çifti i prezantuesve do të zëvendësohet me dy aktorët që bënin pjesë tek grupi i lojërave ‘Pa limit’, Devis Muka dhe Dorian Ramaliu. Përballë Sajmirit dhe Gentit në “Stop”, ‘TCH’ ndoshta ka menduar të vendosë përballë dy meshkuj në ‘Fiks Fare’, pasi gara e audiencës vazhdon e fortë. Fiori zëvendësoi Sajmirin në tavolinën e ‘Fiksit’ dhe mori menjëherë konsensusin e publikut, ndërsa Gent Pjetri është një nga figurat e para të ekranit të ‘TCH’”, shkruante Olti Curri.
Flet Fiori Dardha: Jam larguar nga “Top Channel”, pyesni drejtuesit për detajet
