Kur bëhet fjalë për karrierën e një këngëtari, elementi më i rëndësishëm është vokali. Por kohët kanë ndryshuar dhe tashmë një rëndësi shumë e madhe po i jepet performancës dhe ‘look-ut’. Ndryshime të njëpasnjëshme kemi vënë re më shumë tek artistet femra, megjithatë duket se viteve të fundit meshkujt e kanë kthyer në një detaj kryesor ‘look-un’. E kur jemi tek paraqitja e jashtme, elementi i parë që bie në sy është floku. “RevistaWho.Com” përmes këtij artikulli na kujton disa nga djemtë e skenës shqiptare, të cilët janë dalluar për flokët e tyre të gjatë.
Aleksandër Gjoka
Aleksandër Gjoka është një këngëtar, që ka lidhje shumë të veçantë me flokët e gjatë. Sapo dëgjojmë emrin e tij, direkt na krijohet përpara syve një imazh i pandryshuar për Aleksandrin, aty ku janë flokët e gjatë është ai dhe anasjelltas, aty ku është ai janë flokët. Ne nuk e kemi parë ndonjëherë ndryshe, sikur t’i priste pas kaq shumë vitesh, do të habiteshim vërtet…
Redon Makashi
E kur bëhet fjalë për “Tre musketierët” e muzikës shqiptare, i dyti, dhe po me flokët karakteristike të gjatë, është Redon Makashi. Redoni është ëmbëlsia e baladave në muzikën tonë. “Më lër të fle”, “Dikur luaja me ndjenjën e saj”, “Ekziston”, “Lot në shi” janë vetëm disa nga super hitet që e kemi parë Makashin të interpretojë me kitarë dhe flokët që i valëviteshin si në filmat më romantikë të “Hollywood-it”. Redoni nuk ka për të ndryshuar kurrë stil dhe ‘look’, për këtë është dhe do të mbetet unik.
Elton Deda
S’mund të rrinim pa e shtuar në këtë listë, edhe të tretin e musketierëve, Eltonin. Po ashtu njëjtë si shokët, ai flokët i ka pikë kyçe në personalitetin e tij dhe nuk ka tentuar t’i presë ndonjëherë. Në performancat ‘rock’ të Eltonit, nuk ka çast më të bukur sesa kur flokët “tunden” bashkë me ritmin e shpejt të muzikës.
Stefi Prifti
Korçari i serenatave është një tjetër flokëgjatë i skenës që nuk e ka humbur stilin e hershëm. Stefin nuk e kemi parë shumë herë me flokë të lëshuar, por dhe pse të kapur përsëri ato bien në sy. Fundja, aq shpirt sa jep në interpretimet e tij, nuk kishte si të mos e dallonim. Shpesh te ai kemi hasur dhe ndonjë thinjë, me anë të cilës na ka transmetuar të gjithë fisnikërinë që ka.
Sabiani
Nuk ka nevojë për fjalë, pasi identifikimi i Sabianit bëhet nëpërmjet flokëve të tij të verdhë. Ai solli një frymë ndryshe nga çfarë ishim mësuar më herët. Mund të themi që Sabiani ishte i pari mashkull në showbiz-in e vitit 2000 që leu flokët me ngjyrë të verdhë. Tashmë kjo gjë është kthyer në një trend, por siç thuhet, ai që guxoi i pari mbahet mend..
Gena
Këngëtari Gena është një tjetër figurë e njohur artistike që i ka qëndruar besnikë flokëve të gjatë. Korçari i dashur për publikun vazhdon të ruajë të njëjtin stil prej shumë vitesh. Performancat e tij muzikore duken tepër të ndjeshme, kur shoqërohen dhe nga flokët në lëvizje. Fansat nuk dëshirojnë që Gena të ndryshojë dhe kanë të drejtë. /revistawho.com
