Moderatori i programit “Top Show”, Alban Dudushi, sapo ka nisur sezonin e ri televiziv në “Top Channel”, ndërkohë që paparaci e ka fotografuar në një moment jashtë studios televizive. Në ecjet e relaksit me partneren e tij Bieta Sulo në rrugët e Tiranës, nuk mungon as qenushi i familjes, të cilin çift e marrin me vete kudo ku shkojnë. Bieta, e cila është bashkëpunëtorja më e afërt e Albanit, si kryeredaktore e “Top Show”t, këtë sezon nuk shfaqet më në pozicionin e opinionistes. Vendin e saj dhe të Elona Duros e kanë zënë ish-lojtari i “Big Brother”, Valer Kolnikaj dhe Sara Kapo, vajza e aktores Ema Andrea. Sezoni i ri televiziv në “Top Channel” riktheu të premten e kaluar “Top Show Magazinë”, një natë ndryshe, ku personazhet rrëfehen dhe përballen me njëri-tjetrin. Dy opinionistët e rinj të këtij formati kaluan provën e parë duke ngacmuar me pyetje pikante të ftuarit nga fusha të ndryshme. Valeri dhe Sara janë aty për të bërë ato pyetje që nuk i bën Dudushi, pra duke dalë nga skenari i një prezantimi serioz e për të shkaktuar polemika dhe për të hapur debate. Sipas Valerit, ata të dy do të bëjnë pyetje pa skenar, gjë që e bën më interesant dhe surprizues “Top Show Magazine” të së premtes./ Panorama
