Ditën e djeshme një ish-konkurrent i reality show-t të Top Channel “Big Brother”, ka rënë në pranga. Kjo ka ndodhur pas plagosjes së tre personave të cilët kanë hyrë në konflikt. Nën akuzën e veprës penale “Vrasje me dashje, e mbetur në tentativë, e kryer në bashkëpunim”, gjatë u bë arrestimi i Hënes Dalipaj, 30 vjeç ish-pjesëmarrës në reality show “Big Brother Albania 4” dhe i Eduard Alikaj, 44 vjeç, banues në Vlorë, raporton sot agjencia e lajmeve “Noa”. Policia ka bërë arrestimin e tyre, pasi në lagjen “29 Nëntori” pas një konflikti midis palëve për shkak të parkimit të automjetit, situata është agravuar deri në përdorimin e thikës, ku kanë mbetur të plagosur tre shtetasit F.V., Ç.V. dhe F.V., jashtë rrezikut për jetën. Gjithashtu, nga ky konflikt ka mbetur i dëmtuar fizikisht edhe një nga personat e arrestuar, Eduard Alikaj, i cili ndodhet në spitalin e Vlorës. Tre të plagosurit janë tre punonjës të shoqërisë private të parkimit të mjeteve “Tis-Park”. Paraprakisht dyshohet se gjithçka ka nisur për shkak të bllokimit të gomës së mjetit të të dyshuarit, Eduard Alikaj. Aktualisht policia vijon hetimet për zbardhjen e plotë të rrethanave të ngjarjes
