Fotografi i talentuar Endrit Mërtiri dhe stilistja Bora Kokëdhima akuzohen se kanë kopjuar temën e editorialit të numrit të parë të revistës “Bordo”, veshjet e të cilave janë realizuar nga Enada At Nikolla. Sipas kësaj reviste, seti fotografik i Mërtirit i publikuar të shtunën me veshjet e Bora Kokëdhimës, është kopje e koleksionit të një viti më parë të stilistes Enada At Nikolla. “Gati një vit më pas, një imitim i këtij koleksioni, e mandej edhe një pozë vjen nga stilistja Bora Kokëdhima, që është prezantuar nën siglën Savage dhe fotografi Endrit Mërtiri, teksa pozon modelja Elena Lika. Është kjo mungesë krijimtarie, apo dëshirë për vëmendje?!”, ka shkruar ndër të tjera “Bordo”. Nuk ka vonuar përgjigja e Endrit Mërtirit, i cili ka zgjedhur të reagojë përmes një statusi në llogarinë e tij të “Facebook”. Mërtiri ka publikuar një foto të realizuar nga ai vetë në vitin 2014-të, në të cilin përdoret e njëjta “frymë”, pra kapelet-lule. “Foto e parë (fotografi për revistën Elegancë) e realizuar nga unë, daton me 30 tetor 2014 , kohë kjo kur Bordo ende nuk ishte ngjizur … #FAKT”, ka replikuar ai duke publikuar foton e mëposhtme.
Kështu ka nisur një debat virtual, “hidh e prit” pasi “Bordo” ka vazhduar t’i mëshojë akuzës për kopjim, duke i dedikur fotografit një tjetër status. “Kopertina me kapele-lule ka pasur gjithë kohërave, përpara se të lindnin revistat shqiptare të modës, pasi gjithë fotografët botërore i kanë përdorur. Ja një dëshmi e vitit 2012. Por, sigurisht qe ka dhe me te vjetra! Në rastin konkret në BORDO kemi një përshtatje të veshjeve me kapelet! Kjo e bën një kopje të vërtetë!”, – shënon “Bordo”.
