Kiara Tito dhe Butrint Imeri janë dyshja më e diskutuar në showbiz-in shqiptar për një histori dashurie, e cila nuk është konfirmuar asnjëherë nga dy protagonistët. Gjatë këtyre kohëve kanë qarkulluar shpesh foto paparaci të Kiarës dhe Butrintit, ndërsa pak ditë më parë ata vendosën të shfaqeshin vetë publikisht përkrah njëri-tjetrit. Butrinti publikoi në ‘Instagram’ një foto me moderatoren bukuroshe dhe bashkangjitur saj shkruante: “Hajt, hajt”. Më pas edhe Kiara postoi të njëjtën foto, duke mos dhënë detaje se për çfarë bëhej fjalë. Shumë menduan se mund të ishte si një lloj pohimi se janë bashkë, por mesa duket e vërteta është tërësisht ndryshe.
Ditën e sotme Kiara ishte e ftuar në emisionin e pasdites “Rudina” dhe sqaroi gjithçka në lidhje me foton dhe raportin me Butrintin. Ajo ka treguar se ky imazh është shkëputur gjatë xhirimit të klipit të Imerit, që pritet të publikohet së shpejti. “Fotot janë realizuar gjatë xhirimeve të videoklipit të ri të Butrintit që pritet të dalë së shpejti. Vetëm kaq mund të them, është një surprizë e bukur… Që unë jam pjesë e videoklipit të tij nuk do të thotë që mund të kemi më shumë se miqësi”, është shprehur Kiara. Më tej ajo ka shtuar se në të ardhmen mund të ketë edhe bashkëpunime të tjera me këngëtarin. Ende nuk dihet se kur do të publikohet videoklipi i ri i Butrinit, por me siguri pas fotos dhe këtyre fjalëve të Kiarës kurioziteti nga ana e fansave duhet të jetë shumë i madh. /revistawho.com
